Pūnana Leo

ʻO ka manaʻo o ka Pūnana Leo, ʻo ia nō ka pūnana o nā leo, a pūʻā ʻia ka ʻōlelo Hawaiʻi mai ka waho o nā kānaka ʻōlelo Hawaiʻi o lākou e like me ka ka pū ʻia o ka meaʻai mai ka waha o ka manu makua i ka waha o ka manu huluʻae. Mai ka wā e komo ai ka ʻohana i ka Pūnana Leo, he honua ʻōnahanahiaua e mālama ʻia ai ke kapu,” E ʻōlelo Hawaiʻi wale nō.” He hoʻokikina kēia kapu i ka paʻa wikiwiki o ka ʻōlelo Hawaiʻi i nā ʻohana me nā keiki. Aʻo nā keiki hou i nā ʻōlelo pōkole, nā māmalaʻōlelo, a me nā mele me ke kōkua ʻana o nā kumu me nā mua. Hiki i ka hapanui o nā keiki ke ʻōlelo Hawaiʻi ma loko o ka ʻekolu a i ka ʻehā mahina.

ʻO ka lumipapa Pūnana Leo, he lumi ia e hoʻolale a mālama ai i nā keiki ma ka hoʻokahua mākua ʻana o lākou no ke aʻo a mau loa ʻana. Hiʻohia ke ao i nā keiki ma ka papa haʻawina maoli ola Hawaiʻi i kūpono no ka pae makahiki ma ka honua palekana. He papahanaa kēia no ka ʻohana holoʻokoʻa. Komo pū mai nā ʻohana i nā papa Hui Kīpaepae kēlā me kēia pule ʻelua ma ka honua kula; ka lā ʻohana, me ka hoʻihoʻi honua no ka mālama ʻana i ke kahua kula me ka lumi papa.

Ua hana nui nā kumu Pūnana Leo e hahai i nā kulekele a e hoʻomākaukau pono i nā honua kula i palekana no kāu keiki. Nānā nui ʻia nā kulekele hou e laʻa me ka noho kaʻawale, ka māpoho mau ʻana i ka māpoho no nā kumu, ka hoʻopūʻulu ʻia o nā keiki ma nā pūʻulu liʻiʻilʻi, ka loaʻa o kekahi mau wahi e holoi lima ai a me ke ana wela ʻana i nā kumu a me nā keiki e komo ana i ka honua kula i kēlā me kēia lā.

Ma ka makahiki 2006, ua hoʻonui hoʻi ka ʻAha Pūnana Leo i ka papahana kaiaʻōlelo Hawaiʻi no nā kamaliʻi me ka Hiʻipēpē. He papahana kēia no nā pēpē 9 mahina a i nā kamaliʻi 3 makahiki, he papahana kēia no nā ʻohana e kūpaʻa nei i ka mālama ʻia ʻana o ka ʻōlelo Hawaiʻi ʻo ia ka ʻōlelo kumu ma ko lākou hale. He papahana kēia i piha i nā hana i kūkulu ʻia ma ke Kumu Honua Mauli Ola me nā kiʻina aʻo kūpono o kēia ao e hoʻoulu ana i ka mākaukau launa, ka hoʻopaʻa ʻana i ke kino, a me ka ʻike kālaiʻike Mauli Ola Hawaiʻi.

Nā Pae Makahiki Kula Kamaliʻi:

ʻĪnana 3 – 4 makahiki

Pūnua 4 – 5 makahiki

Pae Papa Hiʻipēpē:

He 9 mahina a i nā kamaliʻi 3 makahiki

Ke Kāki Kula

2024-2025
Kula Kamaliʻi
He $11,550 ke kāki makahiki | hiki ke uku ʻia he $1,050 o ka mahina

Hiʻipēpē
He $18,700 ke kāki makahiki | hiki ke uku ʻia he $1,700 o ka mahina (Hilo | Waiʻanae)

E nānā ma lalo iho i nā hui kākoʻo kāki kula

Hāmama nā Pūnana Leo a pau mai ka 7:30a – 3:30p

He 13 kula Pūnana Leo ma 5 mokupuni. E kipa i ka papa kuhikuhi Pūnana Leo ma ʻaneʻi.

*Pani kū manawa ʻia ka Pūnana Leo o Lahaina.

Ua hoʻokumu ʻia he papahana meaʻai ma kēlā me kēia honua Pūnana Leo e kū ana i nā koina o ka Child and Adult Care Food Program (CACFP) no nā keiki o ka 9 mahina i ka 6 makahiki. Hānai ʻia nā keiki i ka ʻaina kakahiaka, ʻaina awakea, a me ka meaʻai māmā i kēlā lā kēia lā me ke kāki ʻole ʻia o nā ʻohana.

E hoʻopihapiha nā ʻohana a pau i ka palapala CACFP Meal Benefit a me ka CACFP Palapala Kāinoa no ke ʻāpono ʻia ʻana.

ʻAʻohe hoʻokae o ka ʻAha Pūnana Leo ma ka ʻōnaehana ʻae komo ma muli o ka lāhui, ka ʻili, ka hoʻomana, ke keka, kahi hānau, ka makahiki, ke kīnānā, ka moʻokūʻauhau, ke kuana kanaka, ka moʻolelo hopu a hoʻokolokolo, ka pilina kanaka, a me nā ʻano palekana ʻē aʻe a pau i ʻae ʻia ma ke kānāwai.

Ma ka lā 11 ʻAukake 2022, ua hoʻolaha ʻia he mau kulekele kāohi COVID-19 i hōʻano hou ʻia no nā kula kamaliʻi laikini ʻia e ko ka Department of Human Services (DHS). ʻO ke olakino a me ka palekana o nā keiki e mālama ʻia nei ka makakoho nui o mākou. A no ia kumu, hahai pono ʻia ia mau kulekele COVID-19 na ka DHS no nā kula kamaliʻi laikini ʻia e ko ka ʻAha Pūnana Leo (ʻAPL). Kūkulu ʻia ia mau kulekele olakino a palekana ma luna o ka ʻikepili laha e kū nei i kōkua ma ke kāohi ʻana i ka laha o ka maʻi lele COVID-19 i mea e hoʻēmi ʻia ai ka pā o ia maʻi lele ma luna o nā keiki, nā limahana a me nā ʻohana. Ke piʻi aʻe ka nui o ka heluna COVID-19 ma ke kaiaulu, hiki i nā kulekele ke loli.

E ʻoluʻolu e heluhelu piha aku nō i nā kulekele kāohi COVID-19 o ka ʻAha Pūnana Leo aia ma kāu waihona Parent Portal. Inā he nīnau kāu no ia mau kulekele, e ʻoluʻolu e kelepona a i ʻole e leka uila i ke Keʻena Kula Kamaliʻi ma ka (808) 935-4304 a i ʻole ma keenakulakamalii@ahapunanaleo.org.

ʻAe ʻia nā kākoʻo kāki kula no kekahi mau ʻoihana aupuni a kūʻokoʻa like ʻole.

E ʻoluʻolu e kamaʻilio me kou hoa kūkā ʻauhau no ka hōʻoia i nā koina mokuʻāina a pekelala no ka ʻai ʻauhau child care i kōkua ma ka uku ʻana no ka mālama keiki.

No ka ʻikepili hou aku no ke kōkua kāki kula, e kelepona i ke keʻena Kula Kamaliʻi ma ka helu 1-800-498-4979.

Inā he mau nīnau e kelepona i ko ka ʻAha Pūnana Leo ʻoihana kākoʻo ma 1-800-498-4979.