Nā Papahana

Mai ka makahiki 1983, he ōnahanahaiaua ka honua Pūnana Leo e ulu ai nā keiki. ʻŌlelo Hawaiʻi nā keiki ma loko o ka ʻekolu a ʻehā paha mahina, a ma muli o ka papahana heluhelu ʻo Ka Hakalama i hoʻomohala ʻia e ka ʻAha Pūnana Leo, puka aku nō lākou me ka mākau heluhelu a kākau. Mohala pū mai nā mākau launa kanaka, noʻonoʻo, alakaʻi, a ola ma o nā haʻawina, nā huakaʻi, nā hōʻike kaiaulu, a me nā hana manawaleʻa. Hoʻokahua ʻia he kākoʻo ikaika no ke keiki a me nā ʻohana ma o ka papahana hoʻoulu ʻohana e hōʻoia ana i ka mau o ke aʻo ma ka hale. ʻO ka Hui Kīpaepae kahi e aʻo ai i ka ʻōlelo a no ka papahana, a ʻo ka Lā ʻOhana a me ka Hoʻihoʻi Honua kahi e ulu ai a paʻa nā kuleana ʻē aʻe.

Aia ka wā noi komo makakoho no ka makahiki kula 2024-2025 mai 1 Nowemapa a i 1 Malaki.

Ua hoʻokumu ʻia ka Māhele Aukukui, ma ka hana pakanā ʻana me Ka Haka ʻUla o Keʻelikōlani. Ma hope o ka mālama ʻia ʻana o ke aʻoaʻo hana, ua hoʻomohala ʻia ke aʻoaʻo ma o ke keleaʻo no nā kumu ma ka paeʻāina o Hawaiʻi no ka loaʻa ʻana o ka palapala hōʻoia no nā kumu kamaliʻi kaiaʻōlelo Hawaiʻi e kō ai nā koina ʻimi naʻauao.

Ua lilo hoʻi ka ʻAha Pūnana Leo i kumu hoʻohālike no ka hoʻōla ʻōlelo ʻōiwi a he kumuwaiwai no nā ʻōiwi e hoihoi ana i ka hoʻōla ʻana i ko lākou mau ʻōlelo ʻōiwi.

Mai ka hoʻokumu ʻia ʻana o ka pāhana Neʻepapa ma 2010, ua hoʻokipa ʻia ka ʻAha Pūnana Leo i nā ʻōiwi mai ʻō a ʻō o ʻAmelika Hui Pū ʻIa me nā Aupuni ʻē aʻe no ke kōkua ʻana iā lākou no ka hoʻokumu ʻana i kā lākou mau papahana hoʻōla ʻōlelo ʻōiwi.